تحلطم صايمة كويتية (11)
يمسيكم ربي بكل خير وعافية يالغالين، وفطور العافية ومطرح ما يسري يمري، الويك اند الياي راح يكون غير لأن الكل والجميع راح يحتفل بالقرقيعان اللي تم تأجيله بسبب الامتحانات اللي خسبقت الجدول الرمضاني، بس ان شاء الله ربي ما يضيع تعب احد، وطبعا القرقيعان كلنا ننطره امناطر، لأن له نكهة خاصة باليمعة والصفقة والتزهلق والغناوي غير النقصات اللي كل وحده انطع من الثانية، بالمختصر يمعة القرقيعان شي وايد جميل وونيس، وفرصة الواحد يتحلى على عمره ويغنون عليه، بس البعض الله يهداني وياهم من حزب «أنا أنهار على الانهيار» اللي ما تيوز لهم البساطة مختبين قبل لا تثبت شرعا رؤية هلال الشهر، ما بقى ككاو من سويسرا ما يابوه، ولا مطرب ما احجزوه، ولا تخت شرقي ما حطوه، ولا قطار ما زينوه، بس علشان يصير قرقيعانهم خبر عاجل في سناب وانستغرام خنت حيلي، وما يدرون ان اللي بيونهم وياكلون من خيرهم اخر المتمة بحشون فيهم في قروبات الواتساب.
واللي يسلمكم هالسنة جربوا يصير قرقيعانكم قرقيعان اول بسيط، نازك ما فيه تظهول ولا كلافة ولا شحاطه باسجة اتييب الحارج، ولا يهال طرمان ما يغنون ولا يتكلمون بس يستعرضون بدراريع وبدلات قرقيعان والمربيات اهم اللي يغنون بالنيابة عنهم، خل يكون كل اللي فيه يمعة حلوه وغناوي اول وككاو بونجوم الأصلي ودراريع زري، وزبيل امزكرت مرتز بوسط الصاله، واللي يسلمكم جربوا وشوفوا الأناسة والشراحة.

روابي البناي

تعليقات

التعليقات:

اضف التعليق

الرجاء كتابة التعليق

شكرًا لتعليقك. سوف يتم نشر التعليق بعد مراجعتنا.

    إظهار جميع التعليقات