بِدا السباق وخلَّص وحِنَّا
على طمام الوالد المرحوم
تونا انفكر في بلاوي القار
والغير يبحث في غزو لنجوم!!
يا للعجب شِلِّلي جرى وشصار
الكل مشتَّط بالأمر مهموم
الله على اللَّي كبَّر الموضوع
شَيَّس هل الديرة بشكل محموم
ما من كلامٍ بالصحف يا ناس
إلا الحصى اللِّي نَشَّف البلعوم
وشدعوَّه هالضجة معا لِخنَاقْ
كِلَّه على كم شارعٍ مهدوم
الكل لابس شَشّمِةٍ سوده
ويشوف البيَّض قاتمٍ مذموم
روحوا ديارٍ حولُكُم شوفوا
قلِّ الأمان وعيشة الزقوم
لكويت جنَّة ما مثلها اليوم
تَبِي لها حمد وشكر ملزوم
لكويتي ما خَلَّا عرف لِديار
شاف الشعوب وأدرك المعلوم
ندري انها ما تخلى وفيها قصور
بس مو مثل ما صوَّروا لهموم
لكويت قدوة للشعوب الحين
لا.. لا رأت يومٍ لها مشؤوم
النقص في كل الدول جاري
لو تستقص العالم المزحوم
والمشكلة مو بس على هالقار
المشكلة في هالخفي المردوم!!
ترى الغمنده كِلنا نفهمها
بَلع الدراهم والأمر مفهوم
لا حِّبتك عيني غدا شَرّك
راعي الرشاوي يامر ومخدوم
باق الأراضي بالنهار جهار
وكل الطلب جاهز قبل لَيقُوم
حتى الرمل قاموا يزخُّونه
ما ودنا ننبش في سِمانا غيوم
والتشوينات ونهبة الصلبوخ
اللِّي القبس جابت بها لِعلوم(1)
لا خير بالقانون دامِنَّه
يحمي الحرامي ويعتق لرخوم
نرجع على موضوعنا ونقول
كلٍ يبي امن الكيكه المقسوم
لاشك بلادي ما عليها زود
أمن و أمان وعيشةٍ رغدة
ما فيها ظالم لا ولا مظلوم
كل يبي العيشة براضيها
لكويتي فيها مكرَّم ومحشوم
والنعمه لا دامت على المخلوق
تبي لها حمد وشكر ملزوم

1 - المقصود صحيفة القبس

عبدالمحسن عبدالعزيز الدويش

تعليقات

التعليقات:

اضف التعليق

الرجاء كتابة التعليق

شكرًا لتعليقك. سوف يتم نشر التعليق بعد مراجعتنا.

    إظهار جميع التعليقات