القبس

القائمة الرئيسية
الرئيسية / الأولى - ثقافة وفنون / اشخاش لنا خرز أم سليمان؟ (2-2)

اشخاش لنا خرز أم سليمان؟ (2-2)



اول شيء صباح الخير والحب والسعادة، صباح اخر أحد بالسنة ويا بختي وانا اصبح عليكم فيه، صباح كل شيء حلو ينطركم بآخر اسبوع بسنة 2016، أيام تفصلنا عن استقبال السنة الجديدة واللي ان شاء الله تكون بداية خير وسعادة عليكم وعلى كل من يعز عليكم وتتحقق فيها كل امانيكم واحلامكم، واتكون فرصة حلوه علشان نطوي صفحة الماضي بكل مافيها بس ناخذ الحلو منها وانخلي ضيقة الخلق والكدر يروحون معاها.

–  انزين وشنهو هالمفتاح الممقوط بالوسط واللي دار مداره هالنتيفات اللي يشوقون؟
– الله يسلمج هذا مجلسكم ماشاء الله عليه اللي راح يفتح لكم البيبان المسكره اللي صار لها اسنين وابنين محد قادر يبطلها، يعني بشروا بالخير اللي راح ينهال عليكم هيل من غير كيل، اهي قوانين بتتعدل، اهي مشاريع بتتنفذ، اهي ناس مرافق بتتسنع، اهو تعليم مثل الاوادم بتشوفون، اهي وظايف راح تنطر عيالكم من غير لا تترجون فلان وعلنتان، مابي احرق عليكم المفاجآت اللي راح اتشوفونها واللي خاشها لكم مجلسكم اللي بيده المفتاح السحري بس ترقبوا انطلاق مسرحية المفتاح السحرى في 2017.
– واحنا يا أم سليمان قصدي الشعب المملوح الناطع اللي ماله حل ولا موديل اشعلومنه وشنو يديدنا بالسنة اليديدة؟
– عاد انتو حدث ولا حرج، اخاف عليكم من الحسد من كثر ما حالكم يسر الخاطر ويشرح القلب ويخلي الواحد يغني لكم اغنية قيثارة الخليج ام حنين «مثل النسيم»، من كثر ما حالكم راح يتعدل ولا راح يصير عندكم اشمعنه هذا عنده وانا ما عندي، ولا اشحقه هذا خذا وانا ماخذيت، ولا ليش هذي تزوجت وانا للحين ما تزوجت وغيرها من الليشات اللي كنا متعودين عليها، فالشعب الكويتي الحبيب خفيف الطينه راح يصيبه داء انا سعيد انا راضي انا ما بي شي تدرين ليش روابي؟
لأن بفضل الله ومنته راح يكون العدل اهو الحكم بكل اساسيات حياتنا يعني ما راح يكون للقبيلة والطائفة والحزب والعائلة أي وجود بحياتنا اليومية، هذا غير انقلاع المحسوبية من عرجها عن يوميات المواطن الكويتي، وطبعا راح يبدا الكويتي يفكر وينفذ على طول لأن راح يلقى من يسمع له ويشجعه ويمد له يده، عكس السنين اللي راحت من غير رده واللي كان اهو يفكر فيها وغيره يبوق فكرته وينفذها.
وابشرج يا روابي ان مشكلة امحكر الحمام اللي يعاني منها ثلاث ارباع الكويتيين المتقلقصين ببيوت اهلهم راح تنحل، لأن الكويتي اللي يتزوج في 2017 راح يستلم بيته الحكومي اللي كامل، والكامل الله، عقب 8 اشهر من زواجه، هذا غير طلبات الاسكان اللي ذوت وتعرفطت من كثر النطره راح اتشد حيلها وتسوي هروله وتمشي وماراح يصير عندكم طوابير.
والشي اللي راح يونسج وايد روابي ان بسنة 2017 ماراح اتشوفون الظاهرة الفرعونية الخزعبلية القرنقعيه واهي ظاهرة حجاب بوتفخه، وهبة خرعني وانفش شعري من بنات الكويت، وراح ايعنون من الله خير بناتنا الحلوين المملوحين ويطولون تنانيرهم الكلوش ويقتنعون ان ماله داعي النون وما يعلمون يشوفون ارويلاتهم ومفاتنهم، وطبعا الأكيد والمؤكد ان البنات والشباب راح يحاربون «تاج الورد» اللي اييب الحارج مال حجي سناب ولد شات.
اما رياييلنا وشبابنا يالله من فضلك عاد راح اييبون اليهده بسنة 2017 لدرجة انج ماراح اتصدقين هذا اللي اتشوفينه عبيد ولد ام عبيد ولا طوني ولد بريجيت من كثر السنع واللطافه اللي اهم فيها خاصة مع حريمهم، هذا غير نماين «بابا فين»، اللي ما عندهم شغله ولا مشغله غير التسمت بالقهاوي ومخوزر فيفي وميمي وعقب هالبابا ماخذ معاشه التقاعدي وقاطه كله عليهم.
وقبل أن تكمل حديثها قاطعتها بأنني اكتفيت بهذا القدر من الكلام اللي «يبرد الجبد» ويطيب الخاطر واللي أتمنى من كل قلبي أنه يتحقق، وشكرتها باسمي واسمكم أعزائي القراء على هذه البشاير اللي لو صار ربعها احنا بخير.

آخر الكلام:  
أحب أن أتوجه بالاعتذار لكل شخص أسأت له بقصد أو دون قصد، سواء بالكلام أو بالإشارة أو بأي طريقة كانت، وتسببت بجرحه أو مضايقته، والتمس منه العذر لأنني أحب أن أبدي سنتي الجديدة وقلبي أبيض على الجميع، وأتمنى أن يبادلني الجميع هذا البياض، أما أنتم أعزائي القراء فكل عام وأنتم بألف خير ويا رب تكون 2017 سنة خير وسعادة عليكم وعلى الكويت، وأن يحفظكم الرحمن من كل شر ويحقق أمانيكم..
كما أني أشكركم على تحملكم لي طيلة عام كامل، وألتمس منكم العذر على كل زلة أو هفوة تفوهت بها وتسببت بجرح مشاعركم أو إيذائكم، فعذرا لكم أحبائي وكل عام وأنتم بألف خير.

روابي البناي